Sot u zhvillua aktiviteti i përurimit të veprës së dytë të Mid’hat Frashërit, pjesë e kolonës prej 13 vëllimesh të botuara nga Instituti i Studimeve Historike “Lumo Skëndo”.
Vizioni i Mid’hat Frashërit, i njohur në vepra me emrin Lumo Skëndo, është mjaft aktual edhe sot për zhvillimet politike dhe strategjike në rajonin tonë.
Në vëllim e dytë prej 700 faqesh përfshihen ese historike, kulturore, politike dhe ekonomike, ku mbi 90% e tyre janë shkrime të cilat kanë qenë të botuara jashtë vendit dhe janë marrë nga arkivat e Stambollit, Janinës, Gjenevës, Berlinit dhe Parisit.
Drejtori i Insitutuit të studimeve historike “Lumo Skëndo”, Uran Butka, e vlerësoi veprën si një pasuri të madhe kulturore ende të panjohur apo të varrosur, që i kthehet kombit dhe kulturës shqiptare, një kthim i mbramë i Mid’hat Frashërit.
Në fjalën e tij, historiani Beqir Meta vlerësoi analizën profesionale të bërë nga Mid’hat Frashëri për çështjen e Epirit.
“Mid’hati me shumë kompetencë shkencore shpjegon ngatërresën e madhe historike që kanë bërë grekët midis fesë dhe kombësisë”, u shpreh ai.
Politologu, Afrim Krasniqi, veçoi fjalimin e Mid’hat Frashërit në Gjenevë, duke e quajtur një shembull për diplomacinë shqiptare .
“Fjalimet e tij në Gjenevë janë një leksion i shkëlqyer për diplomatët tanë, sidomos edhe në kohët e sotme ku ne mund të bëjmë krahasimin midis pikëpamjeve të tij dhe atyre që quhen negociatorë qoftë edhe për këto problematikat që ne kemi me shtetet e tjera”.
Të shumtë ishin ata që zgjodhën t’i shtojnë bibliotekës së tyre këtë vepër, teksa Instituti i Studimeve “Lumo Skëndo” njoftoi se do të mendojë edhe për ata që nuk kanë mundësi të kenë në dorë vëllimet e Mid’hat Frashërit, duke ofruar formën online për të gjithë lexuesit, studentët dhe studiuesit shqiptarë.